Prattiki superviżorji

Il-miżuri superviżorji tagħna għandhom l-għan li jiżguraw li l-banek li nissorveljaw jikkonformaw mar-rekwiżiti prudenzjali. Il-miżuri tagħna jħeġġu lill-banek jieħdu l-azzjonijiet meħtieġa biex jindirizzaw kwalunkwe kwistjoni kmieni kemm jista’ jkun.

Jekk il-banek jonqsu milli jikkonformaw mar-rekwiżiti prudenzjali jew mal-miżuri superviżorji tagħna, nistgħu nimponu wkoll miżuri ta’ infurzar. Nistgħu nimponu dawn il-miżuri biss fil-każ ta’ ksur li jkun għaddej.

Is-sanzjonijiet huma maħsuba biex jikkastigaw l-imġiba ħażina u jservu mhux biss bħala deterrent għall-bank ikkonċernat iżda wkoll għas-settur bankarju kollu kemm hu. Is-sanzjonijiet tagħna huma maħsuba wkoll biex jinkoraġġixxu kultura ta’ konformità fi ħdan is-sistema bankarja Ewropea.

Fis-superviżjoni bankarja Ewropea l-BĊE huwa inkarigat mill-awtorizzazzjonijiet bankarji. Hawnhekk, il-BĊE japplika l-Ktieb Wieħed tar-Regoli tal-EBA u, fejn rilevanti, il-liġi nazzjonali. Il-BĊE jaħdem ukoll flimkien mas-superviżuri nazzjonali biex jiżgura approċċ konsistenti u standards għoljin madwar il-pajjiżi.

Diretturi xierqa huma kruċjali għall-funzjonament tajjeb ta' bank. Għalhekk il-banek għandhom jiżguraw l-adegwatezza tagħhom fuq bażi kontinwa. Il-BĊE jaġixxi bħala gwardjan u jivvaluta l-adegwatezza tal-membri kollha tal-korpi maniġerjali tal-istituzzjonijiet kollha taħt is-superviżjoni diretta tiegħu.

Mingħajr preġudizzju għad-dritt li jitressqu proċeduri quddiem il-Qorti tal-Ġustizzja tal-Unjoni Ewropea (QĠUE), deċiżjonijiet tal-BĊE li jimponu penali jew jimponu miżuri ta’ infurzar jew superviżorji jistgħu jiġu rriveduti mill-Bord Amministrattiv ta’ Reviżjoni fuq talba tal-bank ikkonċernat.