Ceisteanna Coitianta maidir le Próiseas Athbhreithnithe Maoirseachta agus Meastóireachta (SREP) an lae amárach

Cén fáth a ndearnamar athbhreithniú ar SREP?

D’fhóin ár bpróisis mhaoirseachta go maith dúinn, ach tá an tírdhreach ina n-oibrímid ag athrú, le hathruithe struchtúracha, suaití seachtracha agus rioscaí nua ag cruthú timpeallacht ard-éiginnteachta. Chun leanúint dár sainordú a chomhlíonadh chun bainc na hEorpa a choinneáil sábháilte, rinneamar athbhreithniú ar SREP chun a chinntiú go bhfanfaidh sé oiriúnach dá fheidhm agus go mbeidh ár bpróisis mhaoirseachta níos éifeachtaí agus níos éifeachtúla ná riamh. Dá bhrí sin, chuireamar san áireamh aiseolas, ó athbhreithniú an Ghrúpa Saineolaithe ar SREP agus ó thuarascáil a d’fhoilsigh Cúirt Iniúchóirí na hEorpa, maidir le conas SREP a chuíchóiriú.

Cad a bhí mar aidhm againn a bhaint amach leis an athbhreithniú ar SREP?

Beidh próisis mhaoirseachta níos simplí agus níos solúbtha agus amlíne SREP níos giorra mar thoradh ar na gníomhaíochtaí a dhéanfar mar thoradh ar an athbhreithniú. Tá sé d’aidhm acu freisin cultúr maoirseachta a chothú agus a choinneáil ar bun lena ndírítear níos mó ar phríomhrioscaí, lena gcuirtear breithiúnas cáilíochtúil a bhaineann go sonrach leis an mbanc chun cinn, agus lena spreagtar gníomhaíocht láidir thráthúil nuair is gá. Ar deireadh, cuideoidh na hathruithe linn cumarsáid níos soiléire a dhéanamh leis na bainc a ndéanaimid maoirseacht orthu agus ár gcuid oibre a dhéanamh níos éifeachtúla, níos trédhearcaí agus níos intuartha.

Cén chaoi a bhfuil SREP á athrú againn?

• Pleanáil chuimsitheach: léireofar níos mó agus níos mó inár ngníomhaíochtaí maoirseachta na tosaíochtaí maoirseachta a leagann an Bord Maoirseachta síos gach bliain agus beidh baint acu leo. Cuideoidh sé seo le maoirseoirí a ngníomhaíochtaí a phleanáil i rith na bliana, agus an timpeallacht sheachtrach agus rioscaí a bhaineann go sonrach le bainc faoi leith á gcur san áireamh.
• Measúnú Ilbhliantúil (MYA): bunaithe ar an taithí dhearfach a bhí againn leis an measúnú ilbhliantúil, a thugamar isteach den chéad uair i dtimthriallta measúnaithe SREP 2023 agus 2024, bainfimid leas iomlán as an gcur chuige sin do SREP amach anseo. Ciallaíonn sé sin go leanfaimid de mheasúnú a dhéanamh ar rioscaí na mbanc ar bhealach iomlánaíoch, ach tabharfaidh ár bhfoirne tús áite do roinnt modúl sonrach gach bliain, agus measúnú á dhéanamh ar an gcuid eile ag tráth níos déanaí i gcomhréir leis an gcreat lamháltais riosca (RTF).
• An córas solúbtha measúnaithe riosca (RAS): is féidir measúnuithe riosca áirithe nach bhfuil nasctha le foilsiú tuarascálacha airgeadais bliantúla i mí an Mhárta – lena n-áirítear measúnuithe ar shamhlacha gnó, rialachas inmheánach agus topaicí cáilíochtúla eile – a chur i gcrích ar bhealach níos solúbtha i rith na bliana de rogha na Comhfhoirne Maoirseachta (JST). Leis sin, beifear in ann níos mó éifeachtúlachta a bhaint amach agus measúnuithe cainníochtúla á ndéanamh, agus laghdófar fad an phróisis fhoriomláin ag an am céanna.
• Prionsabal na comhréireachta: tá an prionsabal sin leabaithe i Maoirseacht Baincéireachta BCE agus cuirfear i bhfeidhm é níos mó agus níos mó maidir leis an bPróiseas foriomlán Athbhreithnithe Maoirseachta agus Meastóireachta (SREP). Mar shampla, déanfaimid ár dtuairisciú inmheánach a shimpliú do bhainc bheaga.
• Modheolaíochtaí maoirseachta: tá bunús láidir lenár modheolaíocht, agus déanfaimid ár ndícheall na hathbhreithnithe a dhéanfaimid amach anseo a dhíriú ar rioscaí atá ag teacht chun cinn agus ar iarrachtaí simpliúcháin. Mar shampla, tá athbhreithniú á dhéanamh againn faoi láthair ar ár modheolaíocht maidir le ceanglais Cholún 2 (P2R) chun é a dhéanamh níos simplí agus níos trédhearcaí.
• Uirlisí teicneolaíochta faisnéise agus anailíseacha: leanfaimid de theicneolaíochtaí maoirseachta a ghiaráil chun ár bpróisis a chlaochlú agus a bharrfheabhsú le tacaíocht ó na nuálaíochtaí is déanaí atá ar fáil.
• Cinntí soiléire agus gonta: laghdóimid fad chinntí SREP trí dhíriú ar na príomhábhair imní maidir le maoirseacht, trí ionchais a leagan amach agus trí bhearta inghníomhaithe a chur san áireamh nuair is gá. Giorróidh sé sin amlíne SREP freisin, toisc go mbeidh níos lú ama ag teastáil chun dréachtú, athbhreithniú dlíthiúil agus aistriúchán a dhéanamh.

An n-athróidh sibh an bealach a ríomhann sibh riachtanais chaipitil? Más rud é go n-athróidh, cén uair?

Is mian linn ár bpróiseas chun ceanglais chaipitil a chinneadh a dhéanamh níos éifeachtúla. Leanfaidh P2R de bheith fréamhaithe in SREP agus léireoidh sé dearcadh cuimsitheach na maoirseoirí ar phróifíl riosca bainc. Cuirfear modheolaíocht athbhreithnithe P2R faoi chéim tástála den chéad uair agus ní chuirfear chun feidhme í go dtí 2026. Cuirfear páirtithe leasmhara agus an tionscal ar an eolas go tráthúil faoi athruithe a d’fhéadfadh a bheith ann.

Cad iad na céimeanna a glacadh cheana féin?

Tá céimeanna glactha againn cheana féin chun ár bpróisis mhaoirseachta a fheabhsú trí ord tosaíochta a leagan síos. Mar shampla, in 2023 thugamar isteach creat nua lamháltais riosca (RTF) agus chuireamar tús le measúnú ilbhliantúil ar SREP a chur chun feidhme. Ó cuireadh tús le maoirseacht baincéireachta Eorpach in 2014, rinneamar dea-chleachtais agus cás-staidéir a ghiaráil níos mó agus níos mó, agus in 2021 thosaíomar ar litir feidhmiúcháin a eisiúint mar chuid de chinneadh SREP chuig na bainc chun trédhearcacht níos fearr a áirithiú maidir le hábhair imní mhaoirseachta. Ar deireadh, tá gníomhaíochtaí tagarmharcála simplithe againn, agus tá próiseáil agus anailís sonraí feabhsaithe againn trí chéimeanna atriallacha a uathoibriú.

Céard é an chéad chéim eile?

Glacfaimid cur chuige céimnithe maidir leis na hathruithe ar SREP a chur chun feidhme ar fud thimthriall 2025, a dtiocfaidh deireadh leis i mí Dheireadh Fómhair, agus timthriall 2026, a dtiocfaidh deireadh leis i mí Mheán Fómhair, lena léireofar na hathbhreithnithe a chuirfear chun feidhme de réir a chéile sa dá bhliain amach romhainn. Mar shampla, tabharfar isteach an measúnú ilbhliantúil, an córas solúbtha measúnúnaithe riosca agus cinntí SREP níos giorra i dtimthriall SREP 2025, agus beidh feidhm ag modheolaíocht nua P2R i dtimthriall 2026.

Áiritheofar leis an gcur chuige céimseach sin go mbeidh na hathruithe comhoiriúnach le hamlínte na bpróiseas gaolmhar eile agus go mbeidh na páirtithe leasmhara ábhartha uile rannpháirteach. Déanfaimid faireachán ar an dul chun cinn agus déanfaidh an Bord Maoirseachta machnamh ar fhorbairtí agus ionchorpróimid na ceachtanna a foghlaimíodh ó chur chun feidhme na mbeart sin.