An tAontas Baincéireachta agus an Córas Eorpach um Maoirseacht Airgeadais a thuiscint
AR AN LEATHANACH SEO
Cad é an t-aontas baincéireachta?
Is creat institiúideach é an t-aontas baincéireachta. Is é is aidhm leis an aontas a chinntiú go bhfeidhmíonn bainc faoi sraith aonair rialacha. Tá an t-aontas baincéireachta comhdhéanta den Sásra Maoirseachta Aonair, an Sásra Réitigh Aonair agus córas scéimeanna ráthaithe taiscí náisiúnta comhchuibhithe.
Cén fáth a bhfuil gá leis an aontas baincéireachta?
Bhí laigí in earnáil bancéireachta na hEorpa nochta ag an ngéarchéim airgeadais 2008 agus ag an ngéarchéim fiachais cheannasaigh ina dhiaidh. Dá thoradh seo, cruthaíodh an t-aontas baincéireachta. Is céim ríthábhachtach é i dtreo córas baincéireachta níos láidre, níos aontaithe agus trédhearcach – agus ar an gcaoi sin i dtreo fíor-Aontas Eacnamaíoch agus Airgeadaíochta.
Conas is féidir linn earnáil baincéireachta níos comhtháithe a bheith againn?
- An Scéim Eorpach Árachais Taiscí a bhunú. Chuirfeadh sé sin árachas níos láidre agus níos aonfhoirmí ar fáil do thaisceoirí ar fud an limistéir euro. Cabhródh sé le níos mó éileamh trasteorann a chothú freisin.
- Comhdhlúthú trasteorann a spreagadh. Is féidir le bainc a bheith níos costéifeachtaí agus a neamhchosaint ar rioscaí a roinnt. Má tá banc i dtír atá rannpháirteach san aontas baincéireachta ag iarraidh leas mór de bhanc eile a fháil nó cumasc a dhéanamh, beidh ar an mBanc Ceannais Eorpach, mar mhaoirseoir baincéireachta Eorpach, aon athruithe a fhormheas. Tugaimid sealúchas cáilitheach ar an leas mór seo.
Cad é an Córas Eorpach um Maoirseacht Airgeadais?
Is gréasán é an Córas Eorpach um Maoirseacht Airgeadais (CEMA) atá deartha chun maoirseacht airgeadais chomhsheasmhach agus iomchuí a chinntiú ar fud an Aontais. Tá sé dírithe ar na hÚdaráis Mhaoirseachta Eorpacha (ÚMEnna), an Bord Eorpach um Riosca Sistéamach (BERS) agus na húdaráis mhaoirseachta náisiúnta.
Tá trí UMÉ ann:
- an tÚdarás Baincéireachta Eorpach (ÚBE)
- an tÚdarás Eorpach um Árachas agus Pinsin Cheirde (ÚEÁPC) agus
- an tÚdarás Eorpach um Urrúis agus Margaí (ESMA)
Is maoirseoir baincéireachta Eorpach é an Banc Ceannais Eorpach. Oíbríonn sé go dlúth leis na trí UMÉ, go háirithe an ÚBE.
Cad a dhéanann an Córas Eorpach um Maoirseacht Airgeadais?
Cumhdaíonn CEMA maoirseacht stuamachta ar an macraileibhéal agus maoirseacht stuamachta ar an micrileibhéal araon.
| Maoirseacht mhacrastuamachta | Maoirseacht mhicreastuamachta | |
|---|---|---|
| Céard é féin? | Formhaoirseacht a dhéanamh ar an gcóras airgeadais ina iomláine chun rioscaí don chóras airgeadais a chosc nó a mhaolú. | Maoirseacht a dhéanamh ar institiúidí airgeadais aonair, amhail bainc, cuideachtaí árachais nó cistí pinsin. |
| Cé atá freagrach? | An Bord Eorpach um Riosca Sistéamach (BERS), atá lonnaithe in oifigí an Bhainc Ceannais Eorpaigh in Frankfurt am Main, an Ghearmáin. | Na hÚdaráis Mhaoirseachta Eorpacha (ÚMEnna). Áirítear orthu sin an tÚdarás Baincéireachta Eorpach, an tÚdarás Eorpach um Árachas agus Pinsin Ceirde agus an tÚdarás Eorpach um Urrúis agus Margaí. |
| Conas a dhéantar é? | Athníonn BERS rioscaí sistéamacha. Eisíonn BERS rabhaidh agus tugann sé moltaí maidir le conas dul i ngleic leo. Déanann BERS seo i gcomhar leis na ÚMEnna agus eagraíochtaí idirnáisiúnta. | Oibríonn ÚMEnna chun maoirseacht airgeadais san Aontas a chomhchuibiú. Déanann siad seo trí leabhar rialacha aonair, sraith caighdeán stuamachta d’institiúidí airgeadais, a choinneáil. Déanann ÚMEnna cinnte go bhfuil na rialacha seo curtha i bhfeidhm go comhsheasmhach chun cothrom iomaíochta a chruthú. |