Bearta forfheidhmiúcháin

Bíonn na bearta forfheidhmiúcháin dírithe ar iallach a chur ar na bainc atá faoi mhaoirseacht na ceanglais stuamachta a leagtar síos i gcinntí maoirseachta nó i rialacháin mhaoirseachta a chomhlíonadh. Murab ionann agus smachtbhannaí, níl sé i gceist leis na bearta forfheidhmiúcháin pionós a chur ar na bainc mar gheall ar mhí-iompar, agus ní bhíonn feidhm leo ach amháin maidir le sáruithe leanúnacha. 

Cad iad na bearta forfheidhmiúcháin is féidir le BCE a dhéanamh?

Íocaíochtaí pionósacha tréimhsiúla 

Is príomhbheart forfheidhmiúcháin iad Íocaíochtaí pionósacha tréimhsiúla (PPPanna) atá ar fáil go díreach do BCE. Maidir le maoirseacht baincéireachta, is méideanna airgid iad PPPanna a chaithfidh banc faoi mhaoirseacht a íoc má leanann sé dá oibleagáidí a shárú faoi rialacháin stuamachta nó faoi chinntí maoirseachta BCE.

Is é an sprioc atá ann a chinntiú go gcomhlíontar na hoibleagáidí go tráthúil. Ní mór don bhanc lena mbaineann suim laethúil a íoc – a d’fhéadfadh a bheith chomh hard le 5% dá mheánláimhdeachas laethúil – in aghaidh gach lae a leantar den sárú, suas le huastréimhse sé mhí (is féidir bearta breise a dhéanamh ina dhiaidh sin). 

I gcomhréir le hAirteagal 132 de Chreat-Rialachán SAM, foilsíonn BCE na méideanna iomlána arna bhfabhrú ó PPPanna a ghearrtar ar na bainc laistigh de raon feidhme a chúraimí maoirseachta, cineál agus saghas an tsáraithe agus ainm an bhainc faoi mhaoirseacht lena mbaineann.

Bearta forfheidhmiúcháin eile

Is féidir leis an mBanc Ceannais Eorpach úsáid a bhaint freisin as na bearta forfheidhmiúcháin atá ar fáil faoin reachtaíocht náisiúnta cur chun feidhme sa Bhallstát atá rannpháirteach i maoirseacht baincéireachta Eorpach.