Kif jaħdmu l-fużjonijiet u l-akkwiżizzjonijiet bankarji?

Meta l-banek jingħaqdu flimkien, normalment jagħmlu dan b’wieħed minn żewġ modi: permezz ta’ fużjoni jew permezz ta’ akkwiżizzjoni.

X’inhu r-rwol tal-BĊE f’dan kollu?

Aħna s-superviżur ewlieni għall-akbar banek fiż-żona tal-euro. Aħna ma ngħidux lill-banek biex jingħaqdu jew biex jixtru banek oħra. Iżda jekk jiddeċiedu li jagħmlu dan, aħna niċċekkjaw li l-pjan tagħhom huwa wieħed sikur u li huma qed isegwu r-regoli. Aħna niżguraw li l-bank il-ġdid jew il-bank akbar jitmexxa tajjeb u għandu biżżejjed flus u għandu pjan ta’ negozju sostenibbli.

Jekk fużjoni tinvolvi banek sinifikanti, inħarsu lejn il-pjan u jeħtieġ li ngħidu iva qabel ma din il-fużjoni tkun tista' ssir. It-timijiet lokali jiċċekkjaw il-fużjonijiet li jinvolvu banek iżgħar, iżda għad għandna rwol jekk tkun meħtieġa liċenzja bankarja ġdida jew jekk xi ħadd jixtri parteċipazzjoni azzjonarja kwalifikanti.

X'inhuma r-riskji meta l-bank li jkun għadu kif ġie ffurmat ikun kbir ħafna?

Gruppi akbar normalment joħolqu ekonomiji ta’ skala, li huma ta’ benefiċċju għas-settur bankarju. Għal din ir-raġuni, aħna nappoġġaw il-konsolidazzjoni fis-settur bankarju, sakemm il-gruppi li jirriżultaw jibqgħu sikuri u faċli biex jiġu ġestiti jekk jinqalgħu l-problemi. Il-banek internazzjonali l-kbar iridu jżommu flus żejda f’każ li jsibu ruħhom f’diffikultà, pereżempju f’każ li jiġu ddikjarati li qed ifallu jew li x’aktarx ifallu. Kull bank irid ikun “riżolvibbli” – fi kliem ieħor, għandu jkun hemm pjan ċar għall-għeluq ta’ bank jekk ikun meħtieġ, mingħajr ma jinħolqu problemi akbar.

Il-Bord Uniku ta’ Riżoluzzjoni jistabbilixxi r-regoli dwar l-ammont ta’ flus li l-banek iridu jwarrbu għal xenarji bħal dawn. Dan jgħin biex jipproteġi s-sistema jekk xi ħaġa tmur ħażin.