Nagħmlu s-superviżjoni Ewropea aktar effiċjenti, effettiva u ffukata fuq ir-riskju
Il-banek stabbli huma l-pedament ta’ ekonomija b’saħħitha. Minn meta ġiet stabbilita s-superviżjoni bankarja Ewropea, il-banek fiż-żona tal-euro saru aktar stabbli u kapitalizzati aħjar, b’livelli aktar baxxi ta’ self improduttiv. Il-qafas superviżorju u regolatorju attwali għen lis-settur bankarju jibqa’ reżiljenti, u ppermettielu jkompli jipprovdi servizzi lill-unitajiet domestiċi u lid-ditti, inkluż fi żminijiet ta’ stress.
Il-kisbiet mill-kriżi finanzjarja globali ’l hawn huma pedament b’saħħtu. Iżda l-ambjent li fih qed joperaw il-banek qed jinbidel malajr. Hekk kif it-teknoloġija tinbidel malajr u x-xenarju tar-riskju jevolvi, is-superviżjoni trid tkun reattiva u trid tadatta għal sfidi ġodda biex tibqa’ effiċjenti u effettiva kemm jista’ jkun. Il-banek u s-superviżuri jeħtieġ li jkollhom il-kapaċitajiet analitiċi biex jindirizzaw ir-riskji emerġenti. F’dan l-isfond, qed naħdmu fuq aġenda ta’ riforma komprensiva biex nindirizzaw il-kumplessità bla bżonn fis-superviżjoni, niffukaw mill-ġdid ir-riżorsi tagħna mingħajr ma nikkompromettu r-reżiljenza tal-banek.
L-aġenda ta’ riforma tas-superviżjoni bankarja Ewropea
Qed nagħmlu s-superviżjoni bankarja Ewropea saħansitra aktar effiċjenti, effettiva u ffukata fuq ir-riskju permezz ta’ erba’ inizjattivi ddedikati.
Riforma tal-SREP – kontrolli tas-saħħa regolari tal-banek
F’Settembru 2022, is-superviżjoni bankarja Ewropea nediet rieżami espert indipendenti tal-kontroll tas-saħħa regolari tagħha għall-banek – il-Proċess ta’ Rieżami u Evalwazzjoni Superviżorji (SREP). Abbażi tar-rakkomandazzjonijiet minn dak ir-rieżami, qed nagħmlu l-SREP aktar effiċjenti u effettiv, b’enfasi akbar fuq is-superviżjoni bbażata fuq ir-riskju. Aktar informazzjoni dwar il-bidliet hija pprovduta fl-FAQs tagħna dwar l-SREP ta’ għada.
Ir-riforma tal-SREP tibni fuq deċiżjonijiet preċedenti u qed tiġi implimentata fuq perjodu ta’ tliet snin (2024-26). Għalhekk, il-benefiċċji tagħha se jevolvu maż-żmien, u se nimmonitorjaw u niddokumentaw il-progress permezz ta’ indikaturi bħad-durata taċ-ċiklu tal-SREP, it-tul u ċ-ċarezza tad-deċiżjonijiet tal-SREP u l-informazzjoni dwar is-sejbiet miftuħa.
Aktar informazzjoni dwar ir-riforma tal-SREP:
Passi oħrajn fir-riforma tas-superviżjoni: riforma ta’ attivitajiet superviżorji oħra
L-għan tagħna, li nsiru aktar effiċjenti u effettivi, filwaqt li nibqgħu ffukati bis-sħiħ fuq ir-riskju, imur lil hinn mill-SREP. Bl-użu ta’ esperjenzi mis-superviżuri u feedback minn partijiet ikkonċernati esterni, ħloqna sitt flussi ta’ ħidma li jissimplifikaw ulterjorment il-proċessi u l-proċeduri superviżorji.
F’konformità mal-approċċ ibbażat fuq ir-riskju, l-objettiv ġenerali ta’ kull fluss ta’ ħidma huwa li jiffoka fuq ir-riskji rilevanti u li jiżgura r-reżiljenza tal-banek filwaqt li jnaqqas il-ħin imqatta’ fuq talbiet u kompiti standard. Dan se jippermettilna niffukaw ir-riżorsi fuq l-indirizzar tar-riskji emerġenti u oqsma ta’ tħassib u kumplessità akbar.
- It-titjib tat-teħid tad-deċiżjonijiet u l-isfruttar tad-diġitalizzazzjoni:
-
Qed inħaffu d-deċiżjonijiet superviżorji tagħna bl-għajnuna ta’ għodod diġitali u bi proċedura rapida ta’ teħid ta’ deċiżjonijiet. Pereżempju, id-durata medja tal-valutazzjonijiet ta’ kompetenza u idoneità, li jikkostitwixxu bil-bosta l-akbar għadd ta’ deċiżjonijiet tal-BĊE, naqset għal 97 jum fl-2024 (ferm taħt il-mira ta’ 120 jum stabbilita mill-Awtorità Bankarja Ewropea u mill-Awtorità Ewropea tat-Titoli u s-Swieq). Qed nippilotaw ukoll proċess rapidu għall-valutazzjoni ta’ trasferimenti sinifikanti tar-riskju fit-titolizzazzjonijiet, li żviluppajna fi djalogu mal-Federazzjoni Bankarja Ewropea. Dan inaqqas iż-żmien meħtieġ biex jiġu vvalutati titolizzazzjonijiet sempliċi u standardizzati biżżejjed – mingħajr ma tiġi kompromessa r-reżiljenza – minn tliet xhur għal għaxart ijiem xogħol. Għal titolizzazzjonijiet kumplessi u innovattivi, il-BĊE se jkompli jwettaq valutazzjoni dettaljata u se jkompli jiskrutinizza jekk ikunx inkiseb trasferiment sinifikanti tar-riskju.
- Mudelli interni:
-
Il-mudelli interni li jintużaw għall-kalkolu tal-assi ponderati għar-riskju jgħinu biex jiġi ddeterminat kemm bank jeħtieġ kapital u għalhekk jaffettwaw ir-reżiljenza tiegħu. It-titjib tax-xenarju tal-mudell għalhekk kien prijorità tal-MSU mill-bidu tiegħu. Is-superviżuri jeħtieġ li japprovaw l-użu ta’ tali mudelli minn qabel u jeħtieġ li jkomplu jimmonitorjaw kif jintużaw, inkluż fil-każ ta’ bidliet (materjali). Qed nesploraw modi kif nissimplifikaw il-proċessi superviżorji relatati mal-mudelli interni. L-Awtorità Bankarja Ewropea qed tirrieżamina l-istandards tekniċi regolatorji tagħha dwar il-klassifikazzjoni tal-bidliet fil-mudell, u din hija opportunità tajba biex jitnaqqas l-għadd ta’ bidliet materjali fil-mudell li jeħtieġu approvazzjoni superviżorja.
- Testijiet tal-istress:
-
It-testijiet tal-istress superviżorji jintużaw biex jiġi vvalutat kemm il-banek huma kapaċi jlaħħqu max-xokkijiet finanzjarji u ekonomiċi. Ir-riżultati jgħinu biex jiġu identifikati l-vulnerabbiltajiet u jiġu indirizzati fi stadju bikri fid-djalogu superviżorju mal-banek. Irridu ntejbu t-testijiet tal-istress – f’koordinazzjoni mill-qrib mal-Awtorità Bankarja Ewropea fejn meħtieġ – billi nneħħu proċessi kumplessi bla bżonn u intensivi fir-riżorsi. Dan se jtejjeb il-kapaċità tagħna li nirreaġixxu għar-riskji emerġenti aktar malajr, filwaqt li jnaqqas ir-rekwiżiti ta’ rapportar relatati mat-test tal-istress u l-kostijiet ta’ konformità għall-banek.
- Deċiżjonijiet relatati mal-kapital:
-
Il-kapitalizzazzjoni adegwata hija essenzjali għas-sikurezza u għas-solidità. Il-banek jieħdu r-riskji u jistgħu jġarrbu telf jekk ir-riskji jimmaterjalizzaw. Jeħtieġ li jkunu jistgħu jassorbu dan it-telf biex ikomplu jaqdu lill-klijenti tagħhom anke fi żminijiet ħżiena. Minħabba dan ir-rwol importanti, ċerti deċiżjonijiet relatati mal-kapital jeħtieġu approvazzjoni superviżorja. Se nagħmlu l-proċeduri interni tagħna għal deċiżjonijiet relatati mal-kapital, bħall-approvazzjoni ta’ xiri lura ta’ ishma, aktar ibbażati fuq ir-riskju u aktar rapidi, inkluż bl-użu ta’ għodod diġitali. Għall-banek, dan se jfisser gwida superviżorja aktar ċara, mudelli aktar standardizzati u ħinijiet ta’ bidla aktar mgħaġġla.
- Rapportar:
-
Sabiex ikunu jistgħu jimmonitorjaw ir-riskji u jinfurzaw ir-regolamentazzjoni, is-superviżuri jeħtieġu informazzjoni rilevanti li normalment tinġabar permezz ta’ rapportar standardizzat. Il-qafas ta’ rapportar tal-banek evolva maż-żmien, u dan jirrifletti l-ħtiġijiet ta’ oqsma ta’ politika differenti fil-livell nazzjonali u Ewropew. Quddiem qafas ta’ rapportar kumpless, qed nimmappjaw ix-xenarju ta’ rapportar u divulgazzjoni prudenzjali għal banek sinifikanti u inqas sinifikanti, filwaqt li nqisu l-mandati nazzjonali u Ewropej. Dan se jgħinna nidentifikaw it-trikkib, ir-rekwiżiti skaduti u l-oqsma fejn ir-rappurtar jista’ jiġi ssimplifikat.
- Spezzjonijiet fuq il-post:
-
L-ispezzjonijiet huma għodda kritika għas-superviżjoni bankarja. Dawn jinvolvu analiżi fil-fond tar-riskji differenti, tas-sistemi ta’ kontroll intern, tal-mudelli tan-negozju jew tal-arranġamenti ta’ governanza. L-ispezzjonijiet jipprovdu informazzjoni dettaljata dwar is-sitwazzjoni ta’ bank partikolari, inkluża analiżi li tħares ’il quddiem. Qed intejbu l-effiċjenza tal-ispezzjonijiet fuq il-post, inkluż fl-istadji tal-ippjanar, tal-eżekuzzjoni u tas-segwitu. Se nieħdu approċċ aktar ibbażat fuq ir-riskju meta niddefinixxu l-ambitu u l-intensità tal-ispezzjonijiet fuq il-post.
Valutazzjoni tal-effettività tas-superviżjoni
Il-valutazzjoni tal-effettività tas-superviżjoni hija element ewlieni tal-aġenda ta’ riforma tagħna. Iżda neħtieġu aktar minn indikaturi finanzjarji biex nifhmu l-effettività tas-superviżjoni. Pereżempju, il-proporzjonijiet finanzjarji ta’ bank jistgħu jitjiebu għal diversi raġunijiet, inklużi kundizzjonijiet makroekonomiċi aħjar. Biex nisseparaw dawn il-fatturi, qed intejbu l-għodod analitiċi tagħna biex nivvalutaw aħjar l-effettività superviżorja.
Valutazzjoni regolari
Aħna integrajna valutazzjoni regolari tal-effettività superviżorja fil-proċess tal-ippjanar annwali tagħna. Dan ipoġġi enfasi qawwija fuq eżiti li jistgħu jitkejlu u jiżgura li l-isforzi tagħna jibqgħu orjentati lejn ir-riżultati u jħallu impatt. U approċċ ġdid b’diversi livelli għas-segwitu tas-sejbiet u l-miżuri jippermettilna nittrattaw l-aktar kwistjonijiet kritiċi b’mod aktar effettiv.
It-trawwim ta’ kultura superviżorja ffukata fuq ir-riskju
Il-BĊE u s-superviżuri nazzjonali jaħdmu flimkien biex iwettqu superviżjoni bankarja Ewropea. It-Timijiet Superviżorji Konġunti jlaqqgħu flimkien persunal mill-BĊE u mill-awtoritajiet nazzjonali biex jissorveljaw banek sinifikanti, filwaqt li l-awtoritajiet nazzjonali jissorveljaw banek inqas sinifikanti taħt is-sorveljanza tal-BĊE.
Biex inwettqu l-aġenda ta’ riforma tagħna, qed inrawmu kultura superviżorja bbażata fuq ir-riskju fis-sistema kollha, li tagħti s-setgħa lit-timijiet biex jeżerċitaw ġudizzju u jiddeċiedu fejn l-aħjar li jidderieġu l-attenzjoni superviżorja.
Bil-ħsieb li tissaħħaħ il-konsistenza fis-superviżjoni bankarja Ewropea, nedejna inizjattiva ddedikata biex nixprunaw il-bidla kulturali. L-enfasi hija fuq l-iżvilupp ta’ kultura superviżorja li tkun integrata aħjar, li tkun aktar effiċjenti u effettiva, u bbażata fuq ir-riskju. Kultura superviżorja unifikata se ssaħħaħ is-superviżjoni tagħna u se twassal għal proċessi aktar faċli għall-banek.