Simplifikazzjoni tas-superviżjoni, salvagwardja tar-reżiljenza
Il-banek stabbli huma l-pedament ta’ ekonomija b’saħħitha. Minn meta ġiet stabbilita s-superviżjoni bankarja Ewropea, il-banek fiż-żona tal-euro saru aktar stabbli u kapitalizzati aħjar, b’livelli aktar baxxi ta’ self improduttiv. Il-qafas superviżorju u regolatorju attwali għen lis-settur bankarju jibqa’ reżiljenti, u ppermettielu jkompli jipprovdi servizzi lill-unitajiet domestiċi u lid-ditti, inkluż fi żminijiet ta’ stress.
Il-kisbiet mill-kriżi finanzjarja globali ’l hawn huma pedament b’saħħtu. Iżda l-ambjent li qed joperaw fih il-banek qed jinbidel malajr. Hekk kif it-teknoloġija qed tinbidel u x-xenarju tar-riskju qed jevolvi, is-superviżjoni trid tkun reattiva u trid tadatta għal sfidi ġodda biex tibqa’ effiċjenti u effettiva kemm jista’ jkun. Il-banek u s-superviżuri jeħtieġ li jkollhom il-kapaċitajiet analitiċi biex jindirizzaw ir-riskji emerġenti.
F’dan l-isfond, qed naħdmu mal-awtoritajiet superviżorji nazzjonali fuq aġenda ta’ riforma komprensiva biex nirrazzjonalizzaw u nissimplifikaw is-superviżjoni bankarja Ewropea, filwaqt li niffukaw mill-ġdid ir-riżorsi tagħna mingħajr ma nikkompromettu r-reżiljenza tal-banek. L-erba’ inizjattivi ta’ riforma ddedikati huma deskritti f’aktar dettall fir-rapport tagħna, “Simplifikazzjoni tas-superviżjoni, salvagwardja tar-reżiljenza”.
L-aġenda ta’ riforma tas-superviżjoni bankarja Ewropea
Riforma tal-kontroll tas-saħħa regolari tal-banek
Fl-2022, is-superviżjoni bankarja Ewropea nediet rieżami minn esperti indipendenti tal-kontroll tas-saħħa regolari tagħha għall-banek – il-Proċess ta’ Rieżami u Evalwazzjoni Superviżorji (SREP). Abbażi tar-rakkomandazzjonijiet minn dak ir-rieżami, aħna implimentajna riformi biex l-SREP isir aktar effiċjenti u effettiv, b’enfasi akbar fuq is-superviżjoni bbażata fuq ir-riskju.
Il-bidliet wasslu għal skeda ta’ żmien iqsar tal-SREP u deċiżjonijiet aktar bikrin għall-banek, proporzjonalità akbar fis-segwitu tal-miżuri u komunikazzjoni aktar trasparenti mal-banek. Aktar informazzjoni dwar il-bidliet hija pprovduta fir-rapport tagħna u fl-FAQs dwar l-SREP ta’ għada.
Aktar informazzjoni dwar ir-riforma tal-SREP:
Riforma ta' SREP: lejn superviżjoni aktar effiċjenti u effettiva ICAAP: valutazzjoni superviżorja msaħħa għal ġestjoni tal-kapital aktar b’saħħitha fil-banek Metodoloġija tar-rekwiżiti tal-Pilastru 2 ġdidSuperviżjoni fil-livell li jmiss: riforma ta’ attivitajiet superviżorji oħra
Minbarra r-riforma ta' SREP, tajna bidu għat-tieni sett wiesa’ ta’ riformi bil-proġett ta’ “superviżjoni fil-livell li jmiss”. Dan il-proġett għandu l-għan li jkompli jtejjeb l-effiċjenza u l-effettività fl-attivitajiet superviżorji ewlenin kollha, filwaqt li jibqa’ ffukat bis-sħiħ fuq ir-riskju. Bħala parti mill-proġett, qed inżidu wkoll l-użu tagħna ta’ għodod diġitali għas-superviżjoni.
Se jitnedew aktar inizjattivi, inkluż ir-rieżami tal-applikazzjoni tal-prinċipju tal-proporzjonalità fis-superviżjoni ta’ istituzzjonijiet ta’ kreditu żgħar u mhux kumplessi (SNCIs).
Sir af aktar dwar il-proġett ta’ superviżjoni fil-livell li jmissIt-trawwim ta’ kultura superviżorja ffukata fuq ir-riskju
Il-BĊE u s-superviżuri nazzjonali jaħdmu flimkien biex iwettqu superviżjoni bankarja Ewropea. It-Timijiet Superviżorji Konġunti jlaqqgħu flimkien persunal mill-BĊE u mill-awtoritajiet nazzjonali biex jissorveljaw banek sinifikanti, filwaqt li l-awtoritajiet nazzjonali jissorveljaw banek inqas sinifikanti taħt is-sorveljanza tal-BĊE.
Biex inwettqu l-aġenda ta’ riforma tagħna, qed inrawmu kultura superviżorja bbażata fuq ir-riskju fis-sistema kollha, li tagħti s-setgħa lit-timijiet biex jeżerċitaw ġudizzju u jiddeċiedu fejn l-aħjar li jidderieġu l-attenzjoni superviżorja. Dan jiżgura li r-riformi jiġu implimentati b’mod konsistenti u effettiv fl-unjoni bankarja kollha.
Bil-ħsieb li tissaħħaħ il-konsistenza fis-superviżjoni bankarja Ewropea, nedejna inizjattiva ddedikata biex nixprunaw il-bidla kulturali. L-enfasi hija fuq l-iżvilupp ta’ kultura superviżorja aktar integrata li tkun effiċjenti, effettiva u bbażata fuq ir-riskju. Kultura superviżorja unifikata se ssaħħaħ is-superviżjoni tagħna u se twassal għal proċessi aktar faċli għall-banek.
Sir af aktar dwar l-inizjattiva tal-kultura superviżorjaIl-kejl tal-effikaċja tas-superviżjoni
Il-valutazzjoni tal-effettività tas-superviżjoni hija element ewlieni tal-aġenda ta’ riforma tagħna. Iżda neħtieġu aktar minn indikaturi finanzjarji għal dan, peress li, pereżempju, il-proporzjonijiet finanzjarji ta’ bank jistgħu jitjiebu għal diversi raġunijiet, inklużi kundizzjonijiet makroekonomiċi aħjar.
Għalhekk, is-superviżjoni bankarja Ewropea qed tiżviluppa metodoloġiji għall-evalwazzjoni tal-effettività superviżorja sabiex trawwem superviżjoni aktar orjentata lejn ir-riżultati u ssaħħaħ ir-responsabbiltà.
Sir af aktar dwar kif qed nevalwaw l-effettività superviżorjaKif qed nikkontribwixxu għal inizjattivi ta’ simplifikazzjoni fil-livell Ewropew?
Irridu li s-superviżjoni tkun effiċjenti, effettiva u dejjem iffukata b’mod ċar fuq ir-riskju. Għal dan il-għan, filwaqt li m’aħniex regolatur jew leġiżlatur, aħna nappoġġaw lill-awtoritajiet rilevanti fil-valutazzjoni ta’ modi kif jiġi ssimplifikat il-qafas regolatorju u superviżorju.
Ir-rapport tagħna dwar l-inizjattivi superviżorji ġie ppubblikat fl-istess żmien tar-rakkomandazzjonijiet tat-Task Force ta’ Livell Għoli dwar is-Simplifikazzjoni (HLTF, High-Level Task Force) tal-Kunsill Governattiv tal-BĊE, li jitolbu bidliet leġiżlattivi għas-simplifikazzjoni tal-oqfsa regolatorji, superviżorji u ta’ rapportar. L-inizjattivi superviżorji tagħna jikkomplementaw dawn ir-rakkomandazzjonijiet iżda jistgħu jitwettqu wkoll indipendentement minnhom.
Ir-rakkomandazzjonijiet tal-HLTF iffurmaw il-bażi tar-rispons tal-Eurosistema għall-konsultazzjoni tal-Kummissjoni Ewropea dwar il-kompetittività tas-settur bankarju tal-UE. Ir-rispons jistabbilixxi b’mod ċar kif il-miżuri għas-simplifikazzjoni u l-armonizzazzjoni tal-qafas regolatorju jistgħu jindirizzaw sejħiet usa’ biex jgħinu lill-banek Ewropej isiru aktar kompetittivi.